Aanne stamtaofel trof ich Martie van Toeën van zaal Beatrix (de Vos) en det ésj ein vanne “Stûmp“. En di-j hoezje ieërtieds aane Doeëlhoeëf.Wi-j kojje noow in sieërenaam aan zoeëne beejnaam, zoeëdje zegke. Mer Martie wisj mich te verduutse. Toen zien oma ‘ne kieër aan vare woor met ‘ne wichterwage met ’n kösterkindje d’r in, kwoom ze ‘ne bekindje tieëge en zeuj leet gaer det drubbelke bewoongere. En ’t kommentaar waas: “Och waat ’n leef stûmpke!” en toen waas de femieliebeejnaam geboeëre. En ze hootte later ammaol “vanne Stûmp”. Mer det kindje waat inne wichterwage loog gruudje neteûrlik op en woeërt groeëter. Later zootte beej mich inne klas vanne broêdersschoeël. Jos vanne Stump dus. Femiêlienaam Knaepen. Noow stong dae Jos op zieëker memênt te nowsgierige beej ‘t dörse van ‘t koeëre met ’n dörsmesjien. Dao leep zich ouch ‘ne Duitse Schieëpershoond wat te vervaele en dae zoog inins ’n muuske oet ‘ne boês koeëre scheete. Daen hoond d’r achteraan en kwoom trök met de moês inne moel. Dao kost Jos nieët tieëge en prebierdje det muuske te bevri-jje. Mer dae-n hoond haaj dao ’n ânger gedâcht oeëver en bieët flînk in Joske ziên pisgepoongeldje. “Auwieë !”, kaakdje Joske en hieël z’n hang vuur ziên klokkespuuël. ‘sDaags d’rnao woeërt oppe schoeël gezagdj: “ ’nen Hoond hieët ‘ne stûmp vanne Stûmp zieëne stûmp aafgebieëte. Waat ‘ne stûmperd”. Boeëvegeneûmdje Martie (eigelik Marga) waas ziên zöster en wist d’r dus âl vanaaf. Det gebuuërdje dus aanne Doeëlhoeëf.
Dao loog in vreuger jaore ouch ’n kefee di-j ze de Panneschop neumdje. Dao waas ‘ne Lambers de kastelein, mer later woeërt det Bruinaers oet Ni-wieërt en hèdje ’t De Klûmp. ’t Gebuuërdje ’s det Leentje vanne Kloomp (Klûmp ??) beej de kefee oppen hook van d’n Doeëlhoeëf, D’n Hook dus, zich tezieër begaajdj haaj aan pîlskes, zoeëdetj neet tegooj mieër oppe bein kost bliêve staon um te voot op heivers aan te schravele. Dao wiste e paar mèn aanne tap wul raod op, looje Leentje op ’n kroekèr en voordje ‘m rechtowrechtaan op hoês aan. Toen ze oppen trökwieëg de kèr weer netjes achter inne schop haaje gezatte, goonge ze zich nog e pîlske pakke aane tap en weem zoot dao? Jaowaal: Leentje! Det waas van de kroekèrrit hieël bekaome, haaj zich de bein d’r weer oonger gezatte en pajje de korste wieëg trök oppe kefee aan en gong gewoeën wieter woeëtj effe trök mej oetgeschèdj waas: beer drînke.
In ’t book Stamtafel Weert, waat weer ter koup es, stieët kefee de Hook beschrieëve en waere de Panneschop en de Klûmp ouch geneûmdj.
© Frits Weerts / Bullseye Publishing
Boek Stamtäöfelke kopen
’t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.
