“Jij daarrrrr, aan mijn hòòrrrrrizon. Verrrrdwijn uit mijn ogen!”, zagt de Judas (prefesser Gubbels vant kleezje) tieëge eeme dae achterin de eksterne-studiezaal prebieërdje onordelik te zeen. Mer de Judas haaj arendsouge en haaj det proompt inne smieze, rieët zich op en oongerdrökdje achterein eeder opwelling tot verstuuëring vanne orde. Dus sprook hae boeëvestaondje zin oet mer rollendje rrrrrrrr’s en met gebeêjendj priemendje vînger richting slachtoffer. Dae jong stong op en woeëj, zoeë-as ‘m bevoeële woor, de ruumdje verlaote. “Stop”, schaldje de stum van de Judas weer. “Wat is je naam en waarrr woon jij? “ Ik heet Gerard Kessels en kom uit Nederweert”, zagt ’t mènke. “Dan ga maarrrrr weerrrr zitte”, meindje de Judas, want hae haaj ’n good hèrt vör di-j oet Ni-jwieërt, woeëte zèllef ouch vandan waas. En toen esj met Gerard Kessels toch nog hieëmaol good gekaome. Harrie van Tjeu vanne Meiser oet Tûngelder waas getuûge en zoot zich te verknuuëkele.
Dae verteldje nog wat schoeëns oet dae eksternestudiezaal, waat ichzelf ouch belaefdj heb. Dae zaal zoot herstikke vôl met stadseksterne di-j verplichtj nao de studie moste kaome van 5 wis hallef 8. Umdetter te weinig plaats woor, woeërte de klaslokale d’r naeve ouch vör de studie gebroêktj. Dao zoodje fein boete ’t zicht van de survei-jânt, waat nogal wat muuëgelikhede oeëpendje. De rame van di-j klèskes kieëke oet op de pas aangelagdje Nowwe Mêrrentj en dao loog aanne ângere kânt de bekindje snèkbar “Bon Apetit”. Vae baedje waal eedere daag “Heer, leidt ons niet in bekoring”, mer dao woore ve toch neet tieëgenop gewasse. Hup, de raam oet, vlot oeëver d’n draod geklomme en drieë oppe friet en frikedelle aaf. Oppe trökwieëg de buit effe doeërgaeve aan de studieköp inne klas vuurdejje weer trök d’n draod oeëver klomtj. Smulle mer! As prefesser Nabben deenst haaj, leete zich waal ‘s ontvalle: “Ik ruik frikandellen”, mer det goof niks, want hae waas toen al tezegkes blîndj en zoog neet wi-j vae in ’t geniep zoôte te smauze.
As stadsekstern moszje oeëti-jje boeëdschappe doon vör de interne di-j de kampus neet mochte verlaote. Klasgenoeët Ben Segers en ich ginge oonger ’t spuuëlkerteer altiêd toês effe ’n segret rouke. Oeës mooder raekendje dao-op en haaj de koffie klaor staon. Déks moste ve dan vör d’n ein-of-ângere intern ’n vlaetje of ’n ons kermèls mejbreenge van bakker Zjef van Giel (Nouwen) inne Muuëlestraot. Di-j kloeëdje ve dan mieëstâl doeër ’n döbbeltje oppe pries te zette, want di-j riêke-minse-zuuënkes haaje toch soondesênte zat. Mars waas ouch hieël êrreg in trek, mer dao koste ve niks op verdeene.
Wi-j ve later inne groeëte studiezaal zoôte, kwoom ich ’n tiedje naeve de toen nog onbekindje Joost Prinsen te zitte. Dao most ich ’n pötje pindakieës of sjekladepasta mejbreenge. Dao zoôte dan oonger de studie met ziêne vînger oet te lèkke. Dae vétkanis!
Eíne smieërboel waasj. DAO HAAJ ICH ’N FOTO VAN WILLE HEBBE. Ich gluif neet detter in ziên schrifte ein bladzijde woor di-j neet met înk bekladj woor. Ve schrieëve toen nog ammaol met de vulpen. En allein al ’t völle van zoeë-n pen met rubber zèkske waas al ’n kûnst op zich. Op alle houtere bênk inne klasse en studiezal zoôte dan ouch înkvlèkke di-j d’r noeëts mieër oetgînge. Hieël generasies hebbe aan di-j abstrakte schilderèchtige taferele mejgewêrrektj. Al dan neet bewusj.
© Frits Weerts / Bullseye Publishing
Boek Stamtäöfelke kopen
’t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.
