Ettelikke jaore gelieëje hevvae ’t book “Stamtafel Weert” oetgegaeve. 500 Beûk woore in oongerhalleve maondj herstikke oetverkochtj. Mer de vraog nao det book blieëf aanhaoje. Good noets: d’r keûmtj binnekort ’n heroetgaaf.
’n Kefee di-j dao neet in stieët es kefee De Graaff aanne Mêrrentj. Ajje uch det nog kuntj memorieëre zeeje dik nuuëgentjig jaor aod want ze es in 1930 umgebowdj. Mia de Graaff (Mietje Hakkededie) es dao geboeëre en groeëtgebrachtj, mer di-j ki-jjae allein mer as Mia Rechmann-de Graaff. Getrawdj met Franz (jao, met z) Rechmann, dae in d’n ieërste werreldjooeërlog gedissertierdj woor oet ’t leger vanne Pruuse en zoeë in Wieërt terecht kwoom. Neeme weit mieër det dao ’n kefee woor, mer oppe roêt boeëve de duuër oppe foto stieëget hieël duûdelik. Ge zeetj heej ein van de mieëst frappânte fotoos van Aod Wieërt. De kefee woeërt ‘n elektrozaak en de kloompewînkel d’r naeve woeërt schoonwînkel Leyendekkers. En ’t pând daonaeve, woeë Dré Koeëleke (Coolen) as paekviêster zoot, waas ieerder in hang van de gezösters Verschueren di-j dao ’n kommestiebles- en mannefaktuuërezaak haaje. Ge kuntj de reklaam van Maggi nog zeen. Det woor konkerrênsie vör de Roeëje Matjeu (Kneepkens) d’r tieëgenoeëver dae in koloniale ware dieëj, mer ouch as groeëthandel, woeë di-j port vör deendje woeëje met paerd en kèr oppe binneplaats kosj kaome. Di-j port es allang ewèg en dao kwoome now hoêzer vör inne plaats, woeë later de “Maas- en Roerbode”(Tante Bet) zieënen intrek haaj met ’n etelaasj woeë de minse de gezèt avvâst koste laeze (foto-inzet). In dae’n tiêd (en det waas d’n tiêd dae vae aanne stamtaofel nog good in memorie hebbe) hoezje daonaeve Väös Janssen dae inne zoeëmermaondje eigesgemaakdje eiskout verkocht en woeë de minse beej wêrrem waer tot boete inne ri-j stoonge te wachte um ‘ne lèk-eiskout te bemachtige. Ge haatj d’r al eine vör ’ne knab en ich mein det d’n deûrste ’n kwartje koszje. Twan Schoenmakers (op z’n veerennuuëgentjigste twieë jaor gelieëje d’r tössenoet gepieptj) waas getrawdj met ‘n dochter van Väös. Det beteikendje waal dette op drökke ti-jje as eiskoutopschöpper de femiêlie beej most sprînge um de waar aanne man/vraw te brînge.
Waat ouch opvèltj zeen de gaaslantaers lînks aanne gaevel en inne straot. Daovör ging d’r saoves en smêrreges ’ne mins met ‘ne stek met häökske de stad roond um ze aan en oet te doon. Det haaje vae as kwaojong aafgekieëke en klomme e inne paol, trokke aant ringske en dan bördje de lantaer. En vae de klater op! Det zâl det mènke lînks oonger met z’n klûmp wul neet gelöktj zeen.
© Frits Weerts / Bullseye Publishing
Boek Stamtäöfelke kopen
’t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.
