Ajje eur döp oeëpe haotj, en ge hetj d’r gein pupse in, vèltj d’r achter d’n Iêzere Mân van alles te zeen en te belaeve. Beej ’n ankaete (enquete) van WeertdeGekste veel mich op detter zoeëvöl minse zeen di-j noeëts in oeës bospârk achter di-j waterplas gaon wandele. Di-j wieëte neet waat ze misse. Ajje gaer wildje vêrrekes, mögke, horzels, edelherte en ânger groeët wîldj wiltj bekieke, mojje dao inderdaad neet zeen.
Mer um allerlejse vuuëgel, knienkes, eikuuërkes, boummarters, aendjes, schollevare, zwane en nog hieël völ ânger vieë te bekieke, mojje dao vör ’n aardigheid ’s gaon kieke.
Oeëtt-jje asj hieël stil en röstig es, zeeje wul ‘s ’n paar reetjes (di-j op veer puuëtjes bedoel ich) en ich heb zelfs oeëts damhertjes gespotj. Aant Geurtsven zitte iêsvuuëgelkes en eine kieër veel miên oug zelfs op ’n blawborstje. Ge motj allein effe de tiêd inne gate haoje dejje dao vanne nateur wiltj gaon genete. Oppe vuurmiddige hejje völ kâns det hordes trimmers wi-j tapirs oeëver de bospaej galoppieëre en soondessmêrreges loupdje d’r neet zoonger liêfsgevaor oppe smaal paedjes, want dan meine bendes van 10 tot 20 raadgekke fietserenners um ’t haardst op de smaalste paedjes te motte ri-jje en godverre ouch nog ajje neet oppe tiêd opzi-j springtj. De aso-knörfte! Ze kunne nog neet ’s laeze, want oeëveral staon bordjes met de tekst “Hier niet mountenbiken”. Mer di-j tapirs en fietsers hebbe gein oug vör ’t schoeëns waat det gebied te beej hieët. Zundj! Op di-j ti-jje mojje uch dus dao neet laote kieke. Mer soeëmers hieël vreûg inne mêrrege kujje de zon boeëve d’n Iêzere Mân op zeen gaon, en zittendj op ’n bênkske, met ’t fluitkonzert vanne vuuëgelkes, waer ich dao hieël gelökkig van. Effe later keûmtj d’r laeve inne brouweri-j as Mart van Haps de bieëste vanne kîndjerboorderi-j gieët verzörrege en voore. Ouch de hertjes kriêge eur deil.
En (eindelik!) zeen ze bieëzig met groeët oongerhaod van det prachtg gebied en mèj zeen d’r dan ieëmelike mèn, di-j meine det alles verkieërdj gedaon weûrtj. Want di-j steurluj aanne wâl wieëte ’t stökke baeter as dae bosbouwinzenjeur dae dao jaore vör gelieërdj hieët. De prekerts!
Wandelendj met mien kleinwichter zagte di-j tieëge mich: “Opa, waat zitte heej völ knien, want oeëverâl ligke knienskuuëtele”. “Nein, kiektj ‘s, dieës kuuëtele zeen wat groeëter as di-j vanne knien, di-j zeen van ’n kudde schäöp, di-j heej ’t onkroêd kort haoje.” “En opa, waat zeen det vör spoeëre oppe groond? Di-j streepkes ammaol?” “Jeh, di-j zeen van ’n völ vuurkaomendj waeze, namelik de gestokte homo erectus, ofwaal de nordicwalker, dae zich staondjes mot haoje doeër zi-jlings klöppels as stuuën te hantieëre”. Zoeë mojje di-j jong wat beejbrînge.
© Frits Weerts / Bullseye Publishing
Boek Stamtäöfelke kopen
’t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.
