Stamtäöfelke aflevering 13: Oeëver sjeklaat, segare en êrtesop

0
398
Foto: Kefee Jilissen in 1965. Uit: Weert is veranderd.

Tinus van Janke (Hompes) waas ‘ne verdeenstelike lînksboete in ’t ieërste van Willemina 08. Bekans edere zoondig foeballe dus. Oeëtti-jje noom hae ouch zien eigeste wécht Toosje mej. Neet det det wat um foeballe goof, mer nao de wédstriêd góng Tinus vör de dêrdje helft nao kefee Jileske aan d’n tunnèl aanne Mezeîkerwieëg en nome Toosje mej. Völderlej ânger prefessers-inne-foebalkunde kwome dao beejeîn um te pernoeëstere wi-jtj eigelik haaj gemótte, want dan zoeëje ze zieëker kampioen zeen gewoeëre.Tinus en zien ploog krieëge ‘t sóms zwaor te verdeure. Haaje ze ’t eur mer gevraogdjd! Di-j ’t kunne, di-j kunne neet en di-j ’t neet kunne di-j kunne. Ouch dao goof Toosje gein böl um. Woeëtj um góng, det waas de sjeklaat daetj krieëg. Ederskieër as di-j men ‘ne pot beer bestéldje (toendertiêd mieëst nog e róndje) krieëg Toosje ’n reep sjeklaat umdetj käök waas vanne limmenaat. En asze ‘m niks vroge, hooje ’t mer te kikke en haatj weer ’n reep. Echte Bêlze sjeklaat! Van Meurisse, of Jacques mét allerlejse prêntjes di-jje kosj spare en ruuële um in e plekbook te plekke….

Det waas, en det wieëte ze nog aan oeës stamtaofel, ieërtieds hieël gewoeën. Vröllie droonke neet zoeë völ as di-j mansluj, (woeë és daen tiêd geblieëve?) mer krieëge daovör inne plaats ’n reep sjeklaat. Zieëker wieëte detter vröllie wore di-j ’n groeët kalleflieske bi-j zich haaje um de sjeklaat in op te bêrge. Dan haaje de wichter thoês ouch wat. Dao haaje ze al vantevuuëre oeëver geprakkezieërdj. Inne kefees zooje dan ouch achter d’n tap altiêd ‘n vietrien mét glaze duuër woeë-in de repe sjeklaat en de doeëze sigare stoonge. Want ouch de segare woeërte per stök oeëver d’n toeëg verkochtj. Ki-jje ze nog? Elisabeth Bas, Hofnar (‘nooit fijner gerookt’), Ritmeester, Willem II. En in ’t deurder segmênt, Balmoral en de Heren van Ruysdael. Oeëts waas det hieël gewoeën en allewiel moogtj neet mieër. Vuuërdeîl és dejje deindânger weer kuntj gewaar waere, want vreuger hoonge d’r alezelaeve dikke wôlke inne kroeg. De wichter wore gek op de segarebendjes. Koszje spare en in e schoeëlschrift plekke mët gluton. Dae pleksel kindje ge aanne ruuëk. Beej ti-jje woeërte det hieël verzamelinge in echte dikke albums. D’r wore zelfs kasteleins di-j eur eige snoêtwêrk op zoeë’n segarebendje zatte. “De Mân” vanne Luchtpost haaj zoeë z’n eige segare. Mer hae haaj d’r ouch woeë de foto van z’n vraw op stóng. Of di-j feiner roukdje? Weem zaltj zégke.

Trök nao Jileske. Dao kwoom alderlejs vôlk. Vieëkoupmen (mét deurder segare) di-j dao zake kwome doon en bore di-j eur vêrke, schaop of ’n klócht hinne verkochte. Eîne van eur waas Hârrie van de Vésser (van de Vorst) oet Zwertbrook. Dae kwoom ‘ne kieër dao binne mét ’n pan êrtesop en zagt tieëge Tiny, de kasteleinse: “Zét ’s wat teluurs oppe taofel, want ich heb ’n pan êrtesop mejgebrachtj. Vörs gekoeëktj!” Det woeërt zieër ge-aprisjieërdj, totdet Tiny d’r achter kwoom det eur eige pan sop oet de kuuëke inins pleite woor. En juzzusmiranta, toen woeëre de reube gaar! Det woeëre toendertiêd streek woeë nog arig lang, en verre van noeëj, um gemoonkeldj woeërt. Tiny hieët ‘t os zelf mét pret-uigskes oet de deuk gedaon beej e pötje beer op ’t terras van Dennenoord. Want Jileske és, jaomergenóg, allang tow.

© Frits Weerts / Bullseye Publishing

Boek Stamtäöfelke kopen
’t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.