D’r és geîneneine boor dae z’n vêrke nog oppe mêrrentj kuîptj. En laevendje hinne al aevemîn. Toch waasj tot nao d’n oeërlog gewuuëndje detter oppe plek vúúër de Roeëje Matjeu vieëverkuîpers stoonge mét mânge vôl bagge vör d’n hândel. Dao staon noow de steulkes van ’t terras van De Oude Markt, dae dus eigelik “Beej de Roeëje Matjeu” haaj mótte heîte, want de naam Oude Markt klînktj te Hollands en és in Wieërt ónbekindj. Later verhoeszje dae vêrkesmêrrentj nao de plaats inne Muuëlestraot naeve de hinne-hândel van Fritske Nouwen, umtreentj tieëgenoeëver woeë later de Nowwe Mêrrentj aangelachtj woeërt.
Mer dae vêrkesmêrrentj waas edere zaoterdig, vörâl vör os as wichter, ’n belaevenis. In groeëte lânkwêrpige oet riêzers gevlochte mânge loge op ’ne dikke laog stroeëj, klein schattige kuuskes. Leef um te zeen. En di-j kieëke os, in oeës oûge, doeër de gevlochte déksel vanne mang, altiêd mét hieël pienter uigskes aan. Ge kosj ze ouch vörzichtig aanrake en aaje as de boor neet kieëk. Want dae boor troedje os neet. En geliêk haaje. Want d’r waas geîne groeëtere joeks, as d’n déksel van zoeë’n mang op te höffe, ’t kuuske te laote óntsnappe en dan te kieke waat d’r gong gebuuëre. Allerieërst mószje zelf d’r vör zörge dejje oet de hang van dae boor blieëftj, dus ge vluchtdje ‘nen ângere wieëg in as di-j bag insloog. En dan waasj geneete van ’t schawspuuël wi-j âl di-j vieë-koupluj en kouplustige bore op eur klûmp achter det klein raos korteletje-in-aanmaak mét e krölstèrtje en veer klein puuëtjes, aanréndje umtj tösse de bein te klemme um ‘m te pakke te krieëge. En kwake as di-j bagge koste! Det góng doeër mêrg en beîn. Uut pure lôl begoste de ânger kuuskes ouch mej te kriêse. ’n Klas kakendje schoeëlmaegtjes waas d’r heiligendaag beej. Mer vae haaje pênspien vant lache wi-j det bieësje róf-róf waat d’n hieër gaeve kos en âl kriêsendj tösse de bein van ’t vôlk doeër d’r tössenoet nejdje. Dék krieëge ze ’t aant indj vanne straot pas tösse de bein geklemdj. Vreuger zagte ze dejje mét o-bein good bagge kosj vânge. Zjuustemênt! Met x-bein waasj mer behêlpe.
En dan mójje d’n hândel tösse bore en koupluj betrachte. De kakendje bag weurtj beej de achterpuuj opgepaktj en mét kinnersblik bekieëke en op gewicht geschatj. D’r weurtj ‘ne priês geneumdj. Dan gieëtj wieter mét hendjeklap. Um en um klappe ze de hang opeîn en kake ze wat. Soms gieëtjer haard op. Wuuërd di-j ich uch heej neet kân verduutse. Wi-j de boor ’t vêrke nao hoês verveurdje weît ich neet. Zieëker neet oonger de snelstiek van ziene veêlesepaed want di-j zoogdje dao âmper. Waal korte-kerre-bakke mét ’ne schoonkige boonk mét haverzak vuuër.
Daobeej haadje ounog ‘nen ECHTE greuntjesmêrrentj. Gaardeneers stoonge mét spul oet euren eigeste mooshoeëf oppe mêrrentj um di-j aanne mân te brînge. Vörser koszje ’t neet hebbe. D’n aerd zoot nog aan de aerpel enne poor, en in ’t kappes moos kost nog waal ’s e wörmke zitte en oppe temate e klein plekske. Mer ieërlike kost zoonger opgefokdje kluuër en wéggekweekdje smake. Preuftj ‘s ’n temaat van eme mét e huuëfke op Lamershoeëf en daonao ein vanne mêrrentj mét kilopriês. Dan hoof ich uch niks mieër te verduutse!
© Frits Weerts / Bullseye Publishing
Boek Stamtäöfelke kopen
’t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.
