As ve nog zoeëje gluive, waat vae vreuger vör waor aannoome, haaj de wieëtenschap stil gestânge. Broêder Anselmus vanne twieëdje klas oppe broeêdersschoeël lieërdje os det d’n hieëmel achter de achterste ster loog. Hae wist ouneet baeter. Mer asj waor gewaesj zoeëj zeen, dan doon ve d’r 14 miljard leechtjaor oeëver um dao te kaome! Dan mojje toch waal verrékes völ boeëterhamme bi-j uch hebbe wildje dao aankaome. Maria es met ziel en lichaam in d’n hieëmel opgenoeëme, dus di-j es nog effe oongerwieëges. Dao keûmtj nog beej det ze os pap met gouwe lieëpelkes beloeëfdje inne hieëmel. En ich lös gein pap. En tot inne ieëwigheid met pâlmtékskes staon te zwèjje en halleloeja roope, zeen ich ouch neet zitte. Ich bin allewiel met minder kontênt. Met ‘ne trappist vuur mien naas op ’n terrasje, veûl ich mich inne hieëmel. En as m’n vraw naeve mich zitj kan dao de heilige maagd Maria neet tieëgenop. Laotj mich dao mer zitte. Slivvenhieër zitj neet op mich te wachte.
Ve zeen met z’n 6 miljard en dînke d’r ammaol ângers oeëver waat os te wachte stieët nao d’n doeëd, mer neeme weitj. Ouch aanne stamtaofel zeentj ve d’r neet oeëver ins, mer hawwe os daovör de köp neet in. Mer eeder geluif pretendieërtj detj de ènnigste es dae geliêk hieët en hawdje doeër de ieëwe hieën di-j ângersgeluivinge de hèrses in. Zèllefs allewiel nog. Tachtjig presênt van alle oeërloeëge woore en zeen geluifskwesties. Waat ‘ne onzin eigelik. Geluifdjae in Allah? Nein? Kop aaf! Gluifdjae in Jézeke? Nein? Kop aaf. Boedda es zaligmakendj. Nein? Sodemietertj op! En ouch de Joede oonger aanveuring van Joshua, joôge in Jericho doêzendje jaore gelieëje al ângersgeluivige oeëver de kling. En dan dînkdje wul ‘s: “Wannieër kriegtj de minsheid oeëts verstând?”
Mistrowwe vör ângersgeluivige woeërt os met de paplieëpel ingegaeve. De broêders en zusters zooge leever neet dejje met protestântse of ongeluivige wichter spuuëldje. ’n Gemingdj huwelijk waas ’t èrregste waat dejje verkieërdj kosj doon. Leefdje spuuëldje gein rol, ajje mer ‘t zelleje geluif haadj. Spreuk vanne kêrrek: “Twieë geluive op éín kösse, dao zitj d’n duvel tösse”. En ve spaardje zûlleverpepeer um de heidenwichterkes met gewêldj te duipe um ze beej te kunne schriêve inne ledeliêst van oeës mooder de heilige roomskattelieke kêrk. En di-j kattelieke geistelikke leepe ammaol met lang zwêrte schörte. En waat dînkdje de leste jaore: âl waat kloeëte hieët oonger ‘ne toeëg mojje met ‘t groeëtste mistrowwe betrachte. Det zeen wuuërt van Twan vanne Plak (Stribos) brândwieëroôngerkommandânt in zien jaore, en dan schrief ich nog neet ’s wi-jte-n’t echt zagt. As ich boeëvestaondj vreuger oppe broêderschoeël of ’t Kleezje haaj bewieërdj, waas mich met hel en verdoemenis gedreigdj, zoeëneet al metein vanne schoeël gestamptj. Mer ich laef nog, zoonger bang te hoove zeen det ich boete de gemeinschap waer gezatte. Want det waas vreuger waal zoeë. En det d’n daeke mich geine goojen daag mieër zieët, dao ligk ich neet van wakker. Mer ge kuntj ounog altiêd doon azzof. Schötteri-jje, hermeni-jje, koeëre prizzentieëre zich met hoeëgti-jdaag op ‘t gdróbbel inne kêrk. Det hieët gein kloeëte met geluif te make, want doeër ’t jaor hieën kojje ze dao noeëts tieëge. Sinte Ketrien es dao bedrieëve in. En de Rogstaekers brînge worste nao de nonnekes vör good waer. Gaotj di-j worste astebleef dit jaor trök hale!
© Frits Weerts / Bullseye Publishing
Boek Stamtäöfelke kopen
’t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.
