Aafgeloupe heite zoeëmer zeen vae in ‘n stamtäöfelke di-j mèn tieëgegekaome di-j zich in Oostende in keurig badpak aant verfrisse woore. Wéjje nog? ’t Woor nummer 62. Vae wieëte neet wi-j ze zich in Bêls begaajdj hebbe, mer in Wieërt woore det (bieëlde vae os in) joonges van onbesproeëke gedraag. Ich waas d’r neet beej, en neeme beej os aanne stamtaofel, mer ve hebbe ’n foto woeë di-j hieëre in pak met slieps, gezaete naeve vröllie ( perdon: nette dames) in ‘ne sjieke vwatuur zitte. De opschöppers! Geineneine van di-j joonges kost zoeëne sjieke wage beköstige. Zeen ze daomej, um de vröllie te paaje, ’n stökske gaon toeëre? In dae-n tiêd woore d’r nog weinig maegdjes di-j ’n ri-jbewiês haaje, en heej zitj d’r ein achter ’t steûr? Vae kalle heej oeëver umtreentj 1925. Bekans hoongert jaor trök! De persoeëne inne achterste ri-j oppe foto zitte d’r onwerschiênlik onneteûrlik beej. Net ofze met eure plavuter op ’t rendje vanne porteer zitte. Ich gluif d’r gein kloeëte van. Ajje mieër van dieës fotoos zeetj oet dae-n tiêd, krieje déks dezelleje vwatuur te zeen, allein met ânger vôllek d’r in. Ich krieg zwaor d’n indrök det de porterettemaker in ziên atteljee of z’nen hoeëf ‘ne halleve-n auto haaj staon, dae hae gebroêkdje um minse van stând aan ’n passendj bieëldj vör de boetewèrreltj te hêllepe. En um acht mân in te laaje mojje toch ’n verrèkkese groeëte kèr hebbe. Zoeë kujje ouch wat van eûre Jân make! Zoeë stong d’r in dae tiêd oppe kêrmes ouch ne fotograafdae uch in zoeënenaard auto fotografieërdje en woeëje dan mej op kosj schöppe. In Volendam hejje det nog: ge staektj eure kop doeër ‘n gaat inne schilderi-j, de fotograaf trekt uch aaf en ge hetj ’n foto in Volendams kestuum. Vwala! Net êcht! Gooje tip: ge motj det eur vraw neet laote doon met ’n foto van ’n seksie paoldânseres. Dao krieje moote mej.
Mer weem esj oppe foto? Dezelleje mèn di-j vae in Oostende int badpak hebbe gezeen. Allein noow hebbe ze kompeni-j aan vrouwelik schoeëns, toendertiêd nog knappe pölle. (Jao/nein, zêllef in te völle) Van lînks nao rechs trefdje aan: De ieërste kin ich neet, en dan Alouis Grein, Harrie Weerts, Nella Vaessen (zöster van vorst Zjang Vaossen en later getrawdj met Doeërus Rooymans), Josephina (Fien dus) Broos (zöster van de Wieërter schriêver en teikenaar Piet Broos), Maantje Stribos, Wies Ramakers (later getrawdj met Stang Matijsen), en PierreTeunissen.
En ajje eeme nog wat kedo wiltj doon: “Stamtafel Weert”en “Stamtäöfelkes”noow nog same vör 50 eurokes.
© Frits Weerts / Bullseye Publishing
Boek Stamtäöfelke kopen
’t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.
