Stamtäöfelkes aflevering 27: Aan de proême..en weem deut de was?

0
62
Foto van Joep Kollee: “Wasmesjienkes inne verheur”.

Ber van Tair (Taer??) en Berbke, van Kloompe Tieske (Tobben), góng mét zien kammeräöj , umdet ze dao vlaakbeej woeëndje, op schóbberdeboonk inne fruitbóngerd vanne Frânse Paters. Ze schraveldje oeëver de moor en stopdje eure wîndj-jék en pofbóksepiêpe vôl mét lekker appele, pieërse en proême. Toen rap trök de moor oeëver, d’r tössenoet peetse en op hoês aan want gunter wiêt (> gûnswiêt?) zoge ze broeder Andreas aankaome. Mer det góng zoeëmèr neet, want aannen ângere kânt vanne moor stóng broeder Antonius eur mét ‘ne brejje griêns op te wachte. Ze koste geins kânte op. “Wat hebben jullie daar?“, waas zien vraog. “Niks”, zagte di-j jóng. Antonius  lajje en zagt det ze gein straf zoeëje kriêge en dette neme wat zoeëj verraoje, asze plat oppe groond goonge ligke en veer kieër roond roldje. Di-j jóng wore allang bli-j det ze d’r zoeë vanaaf kwome en dus dieëje ze det, mét ’t gevolg det ze eur waemeskes en bóksepiêpe vôl gekwetsj moos haaje zitte. D’n toter drieëf eur langs liêf en bein. Dao zulle de mooders hieël bli-j mej zeen gewaesj. Gluiftj det mer. Schroompe op e wasbreet mét greun zeîp, want wasmesjienes haadje nog neet. Waal beej “ ‘t Voêl Hûmme” (de Vries, van wasseri-j De Drie Molens aanne knaal) . En Joep Kollee, dae vanaaf 1953 mét z’n fietsekèrke roond rieëj mét wasmesjienkes. Vör drejdoêzendj göldje kochte zich 6 van di-j dinger en ’ne fiets mét kerke. Hae verheurdje di-j apperate vör 1,75  (göldjes!) per oor aan hoêsvrawwe di-j ’t schroompe meug wore. Later noom zien broor Theo det oeëver. Det kaldje zich vlot roond en daorum hoofdje hae gein reklaam te make. Ze brachte de mesjienkes aan hoês en haaldje ze later weer op. Ouch oppe flats van de Sint Joeëzefslaan (toendertiêd de Zjembuurt!!  >waas det neet ’t ‘Bungalowpark??), woeë ze mét det apperaat van 35 kilo de trappe op en aaf móste! Oeëver haard wêrke gesproeëke. Later kocht hae ’ne DKW van Gerrit van Dijk (Electro oppen Drees) en weer wat later ‘nen Opel Olympia beej Bertje Halfers, de bekindje fietsemaker inne Verlingdje Bieëkstraot. Vör alike 300 göldje waasse de mân en bezitter van ‘nen auto dae aanne achterkânt ram ineîn zoot. Dae keduke kânt zaegdje hae d’r aaf, maakdje d’r ’n laadvluuërke op en, hupsekee, hae kost nog mieër apperate roondbrînge zoonger dette zich oet d’n aom móst trappe. De zaak florieërdje. Mer slum minse, zoeë-as (>wi-j?) Theo, dînke wieter. Waat dieëje? Hae góng mesjienkes verheure vör 3 göldjes de waek, di-j beej de klant aan hoês blieëve staon. Geî gesjouw mieër, en saoterdes de cênte ophale, want bânk en giro wore nog vrieëmdje wuuërd vör de luj. Toen kwome d’r waal achter det de groeëtste kakmedamme oet de sjieke buurte slechter van betale wore as ’t aafgepeigerdj hoêsvrawke mét ’n klócht jóng in ’n vôlksbuurt. Stroont weem hieët uch geschieëte? Toen (>Wi-j?) ein van di-j medamme maondje achter waas mét dokke, kwoom hae mane en waas mam de klater op en ’t wécht allein thoês. Det wécht leet ‘m binne en hae noom ’t mesjien mej. D’n tillefoon stóng saoves roeëdglujjendj, mer ze kos van Theo de buim in!

Mer trök nao de proêmebietsers: later vroge ze Antonius wul ‘s um ‘nen appel en dan krieëge ze d’r twieë of drej. Met ‘ne griêns van oeër tot oeër!

© Frits Weerts / Bullseye Publishing

Boek Stamtäöfelke kopen
’t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.