As rechtgeaardjde zoeën van “De Man”, kost Lei Peeters geweldjige kefeeverhaole opdisse. Leefst achter ’n pötje beer aan d’n ein-of-ângere tapkast. En dao stong hae dekker, want hae woor beej di-j kefees ouch de drânkeleveranseer. Zoeë verteldje hae op ein van oeës stamtaofels detter ‘ne klant beej kapper Willie Niëns inne Bieëkstraot kwoom. Dae zat zich inne schaerstool, krieëg ‘ne witte kappersjas umgehânge um zich te laote schaere. Willie most effe nao achter, mer keumntj trök en zuuët dae mins met zien hang oonger ’t lake met z’n eige zitte te spuuële. “Bah!”, deenktj hae en hawtj met zien voêst op dae klant zien hang oonger det lake. “Dao haoje ve heej neet van, nötterik ! “ Krak”, huuërtje. Waas dae mins ziêne brîl aant poetse met de binnekant van dae kappersjas. Brîl nao de kloeëte.
En van Cis de Kapper (Smeets), de ongekruuëndje kuuëning van Luuëke enne Zweeloeëre, doon ouch verhaole de ronde. Hae haaj zien schaersalon inne Bieëmdjestraot, schuuns tegenoeëver de “Hof van Leuken”, woeëte dus nao sloêtingstiêd mieëstâl te vînge waas. Ziêne salon zoot d’n daag doeër ammèr vôl met minse, neet allein um te schaere en knippe, mer um zich te ammezieëre met de kâl van Cis, dae d’r oeëti-jje ‘ne varieté van maakdje. D’r woeërt dèks nog mieër gelache as inne kefee d’r tieëgenoeëver. Cis vroog ’s aan ’n mènke in ziêne schaerstool, wi-jte z’n haor gaer gesnieëje woeëj hebbe. “Van achter kaal, vanvuuëre lânk, lînks gekröldj en rechs bebop”. “Det kân ich neet”, zagt Cis. “Jaowaal”, zagt ’t mènke, “want zoeë hejje ze mich de vuuërige kieër ouch gekniptj!”
Barbeer Cis haaj nog ’n aojerwetse transportabel knip- en schaerinrichting, woeëte gaer mej op mêrrendje met Oude Ambachte stong. ‘nen Aojerwetse schaerstool, staondje speegel met taofel, schaermes met wétlaer en ’n kumke um de schaerkwast inne schoêm te duipe. Manslu-j stoonge inne ri-j um zich nog ’s op ’n aojerwetse meneer doeër kwaffäör Cis te laote schaere. De kwast woeërt in ‘t kumke gesoptj en daomej ’t hieël gezicht dik oonger de schaerschoêm gezatte. Met doem en wiêsvinger vanne lînkerhând heëlle dan ’n stökske vêl strak gespanne en met de rechter snieëje op dae plek de baard aaf. Dan woeërt ’t mes aan ‘ne handdook sekuur aafgevaegdj en kwoom ’t vollegendje stökske baard aanne buurt. ’t Waas ’n hieël rieteweel, woeëbeej Cis z’n moelwêrrek aevegood neet stil stong.
Wi-jte met zien reizendje schaersalon ‘ne kieër met de Stedelikke Hermeni-j in Oeëstenriêk woor, es hae beej ’n wandeling van ’n steigerke int water gevalle. Det hieët ‘m gei good gedaon, want hae es noeëts mieër aane gang gekaome. Hieël jaomer!
© Frits Weerts / Bullseye Publishing
Boek Stamtäöfelke kopen
’t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.
