Aan de korter waerendje daag krieëgdje nao de lange zoeëmer inne gate detj oongerhand tiêd woeërt vör herfst en wîntjer. Aane stamtaofel zeen ve dao neet zoeë kepot van, want det hultj in dejje vanaaf ’t terrasje neet mieër van vuurbeejwândelendj nateurschoeën kuntj genete. Mer de wîntjer hieët ouch zien aantrèkkelikke kânte. Waat smauzeri-j betreftj, bevuurbieëldj. Vae krieëge inins vizioene van moeërepetasie, zoormoos en krolmoos. En vuurâl ’t gedâcht aan ‘ne teluur krolmoos met ’n dikke ruikworst, ‘ne hêrst en ’n zalvig suiske, leet mich ’t water inne bakkes loupe. Dus steurdje ich mien vraw d’r op oet um booremoos te koupe. Ich verknuuëkeldje mich al op ’t koeëke d’r van, want det doon ich gaer, en aansloêtendj woej ich mich dao lieëlik aan begaaje. Mer toen doeëk d’r ’n probleem op. Woeë kojje allewiel nog aan ‘ne stroonk moos? Ajje doeër de boeteni-jje rietj zeeje ’t heej en dao wul staon, mer woeë koupdje nog ‘ne alikke stroonk of zelfs mer alikke blaar? Âl waat mien vraw kos vînge woore plestieke buulkes met fiêngesnupperdj greun goedje d’r in van 300 gram woeë-op stieët “Verse boerenkool. Fijn gesneden”. Uuterst aetbare datum: oeëver ’n waek! Dao börzje toch van! Allerieërst zoeë fiên gesnieëje det ’n moês d’r gein meute mej zoeëj hebbe, de stökskes alik doeër te slikke. En dan ouch nog neet ‘s lang haojbaar. En det deût de duuër tow! Booremoos mot eigelik oppen akker staon wis de vorst d’r oeëverhaer gegânge es. En neet dae vanne Rogstaekers mer dae van ’n paar graad oonger nul. Dan esse pas echt lekker. Toês kujje det klaor kriêge doeër de blaar effe inne deepvrieskâst te legke. Mer dan mojje ze waal ieërst in hoês zeen te kriêge. Inne supermêrrentj löktj uch det dus pertinênt neet. Dao make ze, umdet ze meine dejje toês niks mieër kuntj, alles al zoeëwiêt klaor dejje ’t mer inne kelle hooftj te doon en opaete. ’t Keûmtj nog zoeëwwiêt det ze ’t uch vuurknauwele. Dan hooje allein nog mer te slikke, as det neet tevöl wêrk es. Mer alle hoeëp es neet verloeëre. Ajje áán kuntj pappe met minse di-j ’n eige huuëfke hebbe, bevuurbieëldj op Lamershoeëf, mojje di-j ’s vraoge of ze neet wat booremoos vör uch wille poeëte. Det doon di-j hieël gaer. En ge kuntj ounog de boor op gaon. Tieën tieëge-n ein dejje d’r dao nog eine vurniks kriegtj.
Vanne boor krieëg ich ‘ne groeëte stroonk komplieët met wortels, dae ich toês boete int aerd inne bloompot heb gezatte. Dao heb ich d’n hieële-n wîntjer zat aan. En van ’t restânt maak ich ’n smakeikke dikke booremoosroumsop met wat knopsêlderi-j en prej. Resept via e-mail ajje wîltj. Smauze mân!
© Frits Weerts / Bullseye Publishing
Boek Stamtäöfelke kopen
’t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.
